Փաշինեան Շնորհաւորած Է Մաքրոնը, Զայն Հրաւիրած Է Հայաստան
Posted on April. 27. 2022
Վարչապետ Նիկոլ Փաշինեան շնորհաւորական նամակ յղած է Էմանուէլ Մաքրոնին` Ֆրանսայի նախագահական ընտրութիւններուն յաղթանակի եւ նախագահի պաշտօնին վերընտրուելու առիթով: «Ֆրանսացի ժողովրդի վստահութեան քուէն նախագահի պաշտօնում նախորդ տարիների Ձեր կատարած ծաւալուն աշխատանքի ամենաբարձր գնահատականն է, ինչը վերահաստատում է Ձեր ընտրած քաղաքական ուղեգծի յաջողութիւնը», իր ուղերձին մէջ ըսած է Հայաստանի վարչապետը` շեշտելով. «Հաւատացած եղէք` Հայաստանը Ձեր եւ բարեկամ Ֆրանսայի կողքին կը լինի համատեղ բոլոր մարտահրաւէրների յաղթահարման գործում»: Փաշինեանը համոզմունք յայտնած է, որ Մաքրոնի վերընտրութիւնը գալիք հնգամեակի ընթացքին նոր լիցք պիտի հաղորդէ հայ-ֆրանսական յարաբերութիւններուն եւ հնարաւորութիւն պիտի տայ յաջողութեամբ շարունակելու համաձայնեցուած համատեղ ծրագրերը, այդ շարքին` երկկողմ տնտեսական յարաբերութիւններու աշխուժացման ուղղուած ջանքերը: «Հայաստանը բարձր է գնահատում ԵԱՀԿ Մինսքի Խմբի համանախագահի կարգավիճակում Ֆրանսայի դերակատարումը մեր տարածաշրջանում երկարաժամկէտ խաղաղութիւն հաստատելու հարցում եւ յոյս յայտնում, որ այն շարունակական կը լինի նաեւ Ձեր նախագահութեան երկրորդ հնգամեակի ընթացքում», ըսած է Հայաստանի վարչապետը` «Երեւանում հիւրընկալելու սպասումով»` կրկին շնորհաւորելով Մաքրոնը «վստահ յաղթանակի կապակցութեամբ` մաղթելով ամենայն յաջողութիւն»: Յիշեցնենք, որ Ֆրանսայի մէջ Կիրակի օր կայացած նախագահական ընտրութիւններու երկրորդ փուլի նախնական տուեալներով` Մաքրոնը վերընտրուած է Ֆրանսայի նախագահ: Ան շահած է քուէներուն 57.6 տոկոսը, անոր մրցակից ազգայնական Մարին Լը Փենը` քուէներուն` 42.4 տոկոսը: Մաքրոնը նախագահի պաշտօնը կը զբաղեցնէ 2017 թուականէն: Առաջին ընտրութիւններուն ան կրկին երկրորդ փուլին յաղթած էր Լը Փենին