ՖԻՖԱ-ի Ազգային Խումբերու Մրցումներ. Այսօր` Հայաստան – Քոսովօ
Posted on March. 31. 2024
Այսօր, Պէյրութի ժամանակացոյցով ժամը 18:00-ին, Հայաստանի ազգային խումբը բարեկամական մրցում մը ունի կատարելիք Քոսովոյի դէմ, ՖԻՖԱի շաբթուան ազգային խումբերու դադարի գծով:
Բազմաթիւ ազգային խումբեր կը պատրաստուին 2024-ի Եւրպայի ախոյեանութեան, այլ խումբեր կը խաղան 2026-ի զտումի մրցումներ, իսկ կարգ մը ազգային խումբեր ալ կը պատրաստուին այլ միջազգային մրցումներու:
Հայաստանի ազգային խումբի յարձակող միջնապահ Վահան Պիչախչեան յայտնեց, թէ ինք եւ ազգային խումբը շատ լաւ ձեւով պատրաստուած են եւ կը պատրաստուին այսօրուան մրցումին` Քոսովոյի դէմ:
«Անհամբեր կը սպասենք մրցումին` ուրախացնելու մեր համակիրները: Երկար ժամանակէ ի վեր չենք խաղցած մեր համակիրներուն ներկայութեամբ, եւ ասիկա լաւ առիթ է մեր դաշտին վրայ լաւագոյնը տալու եւ յաջող արդիւնք ձեռք ձգելու: Իմ նպատակս է կոլ նշանակել, բայց աւելի կարեւոր է, որ խում- բը յաղթէ: Իմ ուժեղ կողմս է կոլեր նշանակելը, եւ պիտի փորձեմ նորէն կոլեր նշանակել ազգային խումբին հետ:
Քոսովոյի մասին բաւական տեղեկութիւն ունինք, եւ մեր բոլորին կեդրոնացումը պիտի ըլլայ այս խաղի վրայ: Շատ լաւ հաւաքական ունին, բարձ-րակարգ դասակարգերուն մէջ հանդէս եկող ֆութպոլիստներ ունին, ինչպէս նաեւ նոր մարզիչ ալ ունին: Կը կարծեմ, որ հետաքրքրական մրցում մը պիտի ըլլայ: Բայց մենք ալ լաւ պատրաստուած ենք եւ ամէն ինչ պիտի ընենք` յաղթելու», ըսաւ Վահան Պիչախչեան:
Այսօրուան մրցումէն ետք Հայաստան կը մեկնի Փրակա, ուր երեքշաբթի օր պիտի մրցի Չեխիոյ ազգային խումբին դէմ:
Չեխիոյ ազգային խումբը այսօր պիտի մրցի Նորվեկիոյ դէմ, այս վերջինիս դաշտին վրայ:
Վաղը շատ հետաքրքրական մրցումներ կան Եւրոպայի մէջ, ուր Անգլիա, որ ՖԻՖԱ-ի դասաւորման 3-րդ դիրքը կը գրաւէ, պիտի հիւրընկալէ Պրազիլը, որ 5-րդ դասուած է ՖԻՖԱ-ի կողմէ:
Այլ մրցումի մը, թիւ 2 դասուած Ֆրանսայի ազգային խումբը Փարիզի մէջ պիտի հիւրընկալէ Գերմանիոյ ազգային խումբը, որ վերջերս լաւ արդիւնքներ չէ արձանագրած, մտահոգիչ բան մը, մանաւանդ որ Գերմանիա պիտի հիւրնկալէ 2024-ի ամրան տեղի ունենալիք Եուրօ 2024-ը:
Վերջին անգամ երկու խումբերը մրցած էին Գերմանիոյ մէջ, եւ Գերմանիա 2-1 արդիւնքով յաղթական դուրս եկած էր 12 սեպտեմբեր 2023-ին: Այդ մրցումէն ետք Գերմանիոյ ազգային խումբը Միացեալ Նահանգներու դէմ յաղթանակ արձանագրած էր, ապա յաջորդ երեք մրցումներուն 2 պարտութիւն եւ 1 հաւասարութիւն արձանագրած:
Ստորեւ` այս շաբաթավերջին տեղի ունենալիք բարեկամական կարեւոր մրցումներուն յայտագիրը.