44օրեայ Պատերազմի Օրերուն, Pegasus Լրտեսող Ծրագիրին Թիրախ Դարձած Են Հայ Հասարակական Գործիչներ Եւ Լրագրողներ

Հայաստանէն առնուազն 12 քաղաքական եւ հասարակական գործիչներ, իրաւապաշտպաններ եւ լրագրողներ 44օրեայ պատերազմի օրերուն թիրախ դարձած են իսրայէլեան Pegasus լրտեսող ծրագիրի, բացայայտեց շարք մը միջազգային իրաւապաշտպան կազմակերպութիւններու կողմէ կատարուած հետաքըննութիւնը:
Հետաքննութիւնը պարզեց, որ նշեալները լրտեսող ծրագիրին թիրախ եղած են 2020ի Հոկտեմբերէն մինչեւ 2022 Դեկտեմբեր ժամանակահատուածին մէջ:
Թուային ապահովութեան մասնագէտ Ռուբէն Մուրատեան եւ հետաքըն-նութեան մասնակցած կազմակերպութիւնները շատ հաւանական կը նկատեն,
որ թիրախաւորումին պատճառը նշեալ հակամարտութիւնը եղած է: Այլ մասնագէտ մը՝ Արթուր Պապեան, ընդունելով, որ գլխաւոր կասկածելին Պաքուն է, կ՛աւելցնէ, թէ կարելի չէ անտեսել այն հաւանականութիւնը, որ Հայաստանի իշխա-նութիւնները եւս կրնան մեղսակից ըլլայ, նկատի ունենալով այն իրողութիւնը, որ թիրախներէն ոմանք Երեւանի ներկայ իշխանութիւնները քննադատողներէն են։
Հետաքննութիւնը յայտնաբերած է, որ ծրագիրը թիրախաւորած է «Ազատութիւն» ձայնասփիւռի կայանի հայկական ծառայութեան երկու լրագրողներ Կարլեն Ասլանեանը եւ Աստղիկ Բեդեւեանը: Լրտեսական ծրագիրի զոհերէն են նաեւ Հայաստանի մարդկային իրաւունքներու նախկին պաշտպանը, ՄԱԿի մէկ
պաշտօնեայ, Հայաստանի արտաքին գործոց նախարարութեան նախկին խօսնակը եւ Հայաստանի քաղաքական ու հասարակական կազմակերպութիւններու ներկայացուցիչներ:
«Պատահական չէ, որ մեր հայկական ծառայութեան երկու թղթակիցները, որոնք յայտի են իրենց սուր հաղորդումներով, թիրախ դարձած են Pegasus լրտեսող ծրագիրին: Անոնց տարրական իրաւունքներուն կոպիտ խախտումը վրդովեցնող է եւ մեծ կասկածներ կան, որ պատասխանատուն Ատրպէյճանի կառավարութիւնն է», ըսաւ «Ազատութիւն» կայանի նախագահ Ճէյմի Ֆլայ,
աւելցնելով. «Իշխանութիւնները պէտք է դադարեցնեն խօսքի ազատութիւնը խեղդելու բոլոր ջանքերը եւ ձեռնարկեն անկախ ու թափանցիկ հետաքըննութեան`Հայաստաի եւ Ատրպէյճանի մէջ բացայայտուած Pegasus-ի յարձակումներուն վերաբերեալ»:
Ըստ հետաքննութեան, Pegasus-ը օգտագործուած է նաեւ Ատրպէյճանի մէջ՝ թիրախաւորելու լրագրողների, քաղաքական եւ հասարակական գործիչներ եւ յատկապէս ընդդիմադիր քաղաքական անձնաւորութիւններ:
Pegasus-ը արտադրուած է իսրայէլեան NSO Group-ին կողմէ եւ ցարդ աշխարհի շուրջ 50 երկրներու մէջ օգտագործուած է գործող եւ նախկին քաղաքական ղեկավարներու, հասարակական-քաղաքական գործիչներու, լրագրողներու, իրաւապաշտպաններու եւ գործարարներու դէմ:
(Քաղուած «Ազատութիւն» կայանի, «Ամերիկայի Ձայն»ի եւ «Էն.Պի.Սի. Նի-ուզ»ի հաղորդումներէն)