2020 թուականի աշնանը Արցախի Հանրապետութեան դէմ միջազգային ահաբեկիչների ներգրաւմամբ եւ Թուրքիայի բացայայտ մասնակցութեամբ Ազրպէյճանի կողմից սանձազերծած պատերազմի արդիւնքում հրադադարի հաստատման նպատակով նոյեմբերի 9-ին ստորագրուած եռակողմ յայտարարութիւնից ընդամէնը մէկ ամիս յետոյ գրանցուեցին փխրուն խաղաղութիւնը խախտելու բացայայտ գործողութիւններ. ս.թ. դեկտեմբերի 11-ին եւ 12-ին Հատրութի շրջանի Հին Թաղեր, Խծաբերդ գիւղերի եւ քրիստոնէական Կատարօ հանրայայտ վանքի ուղղութեամբ Ազրպէյճանի զինուած ուժերը ձեռնարկել են բացայայտ յարձակողական գործողութիւններ, որի արդիւնքում կան վիրաւորներ, իսկ հակառակորդը յայտնում է նաեւ կենդանի ուժի կորուստների մասին:
Արցախի խորհրդարանի բոլոր խմբակցութիւնները խստօրէն դատապարտում են եռակողմ յայտարարութեան դրոյթների կոպիտ խախտումը եւ յայտարարութիւնը ստորագրած երեք կողմերին յորդորում են միջոցներ ձեռնարկել իրավիճակն արագ շտկելու ուղղութեամբ եւ տեղեակ են պահում, որ նախկին բնագծերը չվերականգնելու դէպքում Արցախի Հանրապետութեան իշխանութիւնները պարտաւոր են լինելու կիրառել ժողովրդի ինքնապաշտպանութիւնը կազմակերպելու բոլոր հնարաւոր միջոցները:
Մենք յայտարարութեան կողմերին եւ ԵԱՀԿ-ի Մինսքի խմբի համանախագահութեան ուշադրութիւնն ենք հրաւիրում այն փաստի վրայ, որ գրանցուած եւ շարունակուող լարուածութեան պայմաններում խիստ պահանջուած է դիտարկւում ղարաբաղեան հակամարտութեան համապարփակ կարգաւորման ուղղութեամբ ջանքերը շարունակելու անհրաժեշտութիւնը, որի գլխաւոր կէտը պէտք է համարել Արցախի Հանրապետութեան միջազգային ճանաչումը` որպէս այս տարածքում ապրող մարդկանց ապրելու անօտարելի իրաւունքի ապահովման գերակայ պայման:
Խմբակցութիւնները դատապարտում են նաեւ Ազրպէյճանի ռազմաքաղաքական ղեկավարութեան քայլերը, որոնք ուղղուած են Ռուսաստանի Դաշնութեան խաղաղապահ զօրախմբի գործողութիւնների արդիւնա-ւէտութիւնը կասկածի տակ դնելուն, եւ կոչ են անում առա-քելութեան ղեկավարութեանը հասցէական գնահատական տալ գրանցուած միջադէպին եւ ամբողջութեամբ ապահովել հրապարակուած յայտարարութեան առաջին կէտից բխող բոլոր պայմանները:
Ք. Ստեփանակերտ
13 դեկտեմբեր 2020
